ឯកឧត្តម​បណ្ឌិត​ សោម​ ពិសិដ្ឋ​ អភិបាល​ នៃគណៈអភិបាលខេត្ត​កែប​ បានអញ្ចេីញជាអធិបតី​ក្នុងពិធីបើកការដ្ឋានសាងសង់ផ្លូវបេតុងអាមេ ប្រវែង ៣៦៥ម៉ែត្រ ទទឹង៥ម៉ែត្រ ស្ថិតនៅភូមិកែវក្រសាំង សង្កាត់កែប ក្រុងកែប

ខេត្តកែប៖នៅព្រឹកថ្ងៃទី១៦ ខែវិច្ឆិកា ឆ្នាំ២០២២​ នេះ​ ឯកឧត្តមបណ្ឌិត សោម ពិសិដ្ឋ​ អភិបាល​ នៃគណៈអភិបាលខេត្ត​ បានអញ្ជើញជាអធិបតីភាព បើកការដ្ឋានសាងសង់ផ្លូវបេតុងអាមេ ប្រវែង ៣៦៥ម៉ែត្រ ទទឹង៥ម៉ែត្រ ដែលស្ថិតនៅក្នុងទឹកដីភូមិកែវក្រសាំង សង្កាត់កែប ក្រុងកែប អអមដំណើរឯកឧត្តមបណ្ឌិតអភិបាលខេត្ត ក្នុងនោះរួមមាន លោក​ លោកស្រី​ អភិបាលរងខេត្ត​ តំណាងកងកម្លាំង​ទាំងបី​ ប្រធាន​ អនុប្រធាន​មន្ទីរ​អង្គភាពជុំវិញខេត្ត​ នាយក​ នាយិកា​ ទីចាត់ការ​ចំណុះសាលាខេត្ត​ អាជ្ញាធរ​ក្រុង​ សង្កាត់​ ភូមិ​ និងបងប្អូន​ប្រជាពលរដ្ឋ​ជាច្រើនរយនាក់ផងដែរ។

​ 
បេីតាមរបាយការណ៍របស់លោក ខេង យ័នអភិបាលក្រុងកែប​ បានអោយដឹងថា ក្នុងអាណត្តិទី៣​ របស់ក្រុមប្រឹក្សាក្រុង រដ្ឋបាលក្រុង​ បានកសាងផ្លូវបេតុងអាមេចំនួន៣ ខ្សែប្រវែង ១០២៦ម៉ែត្រ ដែលប្រើបាស់មូលនិធិអភិវឌ្ឍន៍ឆ្នាំ២០១៩ ឆ្នាំ២០២០​ និងឆ្នាំ២០២១ សរុបថវិកាអស់ចំនួន  ៤៩៦.៣៣៨.១៤៦រៀល ដើម្បីបម្រើសេចក្ដីត្រូវការរបស់ប្រជាពលរដ្ឋ។
 
  មានប្រសាសន៍សំណេះសំណាល​នឹងផ្ដាំផ្ញើរ នាឱកាសនោះ​ដែរ ឯកឧត្តមបណ្ឌិត​ សោម​ ពិសិដ្ឋ​ អភិបាលខេត្ត បានលើកឡើងថា សមិទ្ធផលដែលយើងទទួលបានជាបន្ដបន្ទាប់នេះ  កឺបានកើតឡើង ដោយសារប្រទេសជាតិរបស់យើង នៅតែរក្សាបាននូវសុខសន្តិភាព ស្ថិរភាពនយោបាយ  ក្រោមការដឹកនាំប្រកបដោយគតិបណ្ឌិត  របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា  ដែលធ្វើឱ្យយើងមានឱកាសគ្រប់គ្រាន់ ក្នុងការអភិវឌ្ឍន៍មូលដ្ឋាន ក៏ដូចជាសេដ្ឋកិច្ចគ្រួសាររបស់យើងទាំងអស់គ្នា  ឱ្យកាន់តែមានជីវភាពធូរធារសម្បូរសប្បាយ។​

ឯកឧត្តមបណ្ឌិត  ក៏បានអំពាវនាវដល់បងប្អូនប្រជាពលរដ្ឋដែលរស់នៅតាមដងផ្លូវ សូមចូលរួមសហការ​ និងបរិច្ចាគដីចំណីផ្លូវ ដើម្បីឱ្យផ្លូវមានលក្ខណៈធំទូលាយ មានសោភ័ណភាព  និងមានសុវត្ថិភាពក្នុងការធ្វើដំណើរ​។​

ឯកឧត្ដម​បណ្ឌិត​ ក៏បានណែនាំដល់អាជ្ញាធរមូលដ្ឋាន​ និងបងប្អូនប្រជាពលរដ្ឋ​ ត្រូវចូលចូលរួម​សហការ​អនុវត្ត​នូវគោលនយោបាយភូមិឃុំ​ មានសុវត្តិភាព​ទាំង៧ចំណុច​ និងត្រូវគោរពច្បាប់ចរាចរណ៍ផ្លូវគោក អោយបានគ្រប់ៗគ្នា​ ដេីម្បីធានាសុខសុវត្តិភាពរបស់បងប្អូន​ អំពីគ្រោះថ្នាក់ដែលកេីតមានជា​យថាហេតុ៕